Quienes custionamos el sistema nun tenemos sitiu nos medios de comunicación masivos. Y cuando lu tenemos, les informaciones tán manipoliaes de tala forma que'l mensaxe resulta falseáu, anuláu o utilizáu pa la descalificación.
El papel manipulador y desinformador de los medios de comunicación masivos rescampla, como tamién lo ye la necesidá de respuender de manera nidia ante una situación de dispersión, atomización y gastadura na llucha por dar a conocer la realidá que vivimos, y que ye despintada sistemáticamente.
Medios de comunicación que tienen como misión incomunicar, manipoliar y desinformar a la xente. Son como la monarquía democrática, una contradicción en sí mesmos. Invisibilizan y sumen la realidá real hasta convertir la realidá virtual na única realidá posible: “Méxennos y dicen que ta lloviendo”.
Escribe Ramonet: “ La fragmentación sutil de l'actualidá nun mosaicu de fechos separaos del so contestu tien como oxetivu principal distrayer. (…) Evitar que se cavilgue sobre lo esencial a partir de la información”.
La información convertióse nuna mercancía controlada poles lleis del mercáu. Los medios de comunicación masivos xustifiquen la corrupción, la inxusticia social, el machismu, el racismu, les violaciones de los derechos humanos o les guerres. Refuercen permanentemente'l mecanismu de control, presión y represión social más perfectu y efectivu: el mieu, un mieu a tou, del que se faen voceros indiscutibles ya interesaos.
Dende la esquierda, l'asturianismu, los movimientos sociales y los sindicatos tendríamos qu'asitiar ente los nuesos oxetivos y propuestes: la democratización de la comunicación, el so fortalecimientu como serviciu públicu, un mayor y meyor control sobre los negocios de la información, l'alfabetización en comunicación de los ciudadanos y ciudadanes, el derechu d'accesu pa les iniciatives sociales y garantizar los derechos llaboral y profesional de la xente que trabaya nos medios.
Escribe Galeano: “Quienes tienen drechu a sentir y güeyar nun cesa d'amontase, en tantu amenórgase vertixinosamente'l númberu de quien tienen el privilexu d'informar, d'espresase, de crear. La dictadura de la palabra única y de la imaxe única (…) otorga'l títulu de ciudadanu exemplar a quien ye consumidor somorgiáu, espectador pasivu, fabricáu en serie, a escala planetaria, conforme al modelu propuestu (…) . Nel mundu ensin alma que los medios de comunicación preséntennos como l'únicu mundu posible, los pueblos fueron reemplazaos polos mercaos; los ciudadanos y ciudadanes, polos consumidores; los pueblos y naciones, poles empreses (…). Nunca la economía y la comunicación fueron menos democrátiques, nin el mundu tan escandalosamente inxustu”.
Perder la edición en papel de Notícies, l'únicu periódicu na llingua propia de Asturies, ye otra mala noticia pa esti país.
